It is in sinnige én kâlde dei as ik dit foarwurd skriuw. It friest in pear graden en dochs is de natuer him alwer oan it tarieden om daliks yn fol ornaat nei bûten ta te kommen. Ik moat jo tajaan dat it by my ek folle mear buorrelet en brûst. En hooplik ek by jo as ûndernimmer. Is de winter mear de tiid om nei binnen te kearen, de kommende maitiid soarget wer foar de blik foarút. Net allinnich foarút yn it kommende jier, mar ek foar de jierren dêrnei. Dêrom bin ik bliid dat dizze edysje ûnder oare oer ferduorsuming giet. Want wy wolle ús prachtige regio dochs behâlde en neilitte oan de generaasjes nei ús?
Mar wêrom soene jo as bedriuw kieze foar duorsum ûndernimme? Fansels is bydragen oan in bettere wrâld in wichtige reden. Mar wisten jo ek dat duorsum ûndernimme de kosten ferleegje kin? En dat it kânsen biedt foar nije fertsjinmodellen en omsetstreamen?
Hieltyd mear klanten freegje om duorsume produkten en tsjinsten. Ut yntrinsike motivaasje kieze se leaver foar in bedriuw dy’t jout om de planeet. Troch no al duorsume produkten en tsjinsten oan te bieden, lûke jo net allinnich klanten oan, mar ek motivearre wurknimmers dy’t graach foar in duorsum bedriuw wurkje.
Net allinnich klanten, mar ek ynvestearders en partners sjogge hieltyd mear nei duorsumens. In duorsum belied kin soargje foar bettere gearwurkingen en nije kânsen. In soad belanghawwenden geane graach yn see mei in duorsum bedriuw.
Nederlân set yn op sirkulariteit yn 2030. Dat hâldt yn dat bedriuwen harren ôffalstreamen drastysk ferminderje moatte. En dat bedriuwen harren ynsette moatte op wergebrûk en recycling. De oerheid stimulearret dit mei subsydzjes en strangere easken. Troch no al kritysk te sjen nei jo ôffalstreamen en bedriuwsprosessen besparje jo kosten én is jo bedriuw klear foar de takomst.
Undernimmers yn Fryslân krije in unike kâns om, yndividueel of mienskiplik, te ferduorsumjen troch in nije regeling fanút it Ryk, útfierd troch de Provinsje Fryslân. Dy regeling rjochtet him spesifyk op lytse en mikro mkb-bedriuwen en bedriuweterreinen. Benijd wat dizze regeling foar jo bedriuw of bedriuweterrein betsjutte kin? De útfiering fan dy regeling hat de Provinsje Fryslân dellein by Ynbusiness, it ûndernimmersloket yn Fryslân. Yn’e mande mei jo wurkje de Provinsje Fryslân Ynbusiness en gemeenten graach oan in sterk en takomstbestindich MKB yn Fryslân!
Boargemaster Johannes Kramer
Gemeente Noardeast-Fryslân
